就快放暑假囉, 大家有無其他旅行嘅心水呀?日本係比較多人去嘅地方, 但係7月啦, 櫻花都落咗啦, 有無其他唔需要特定嘅日子去都有靚景睇嫁? 有呀, 就係夜景啦, 宜家同大家介紹吓日本五大夜景啦:

第五位:  北九州嘅皿倉山

"皿倉山"好似唔太熟嘅名字, 其實喺世界排名上可以用價值百萬嚟形容佢嘅夜景, 但大家要分2段纜車至可以上到去嫁。上去嘅纜車因為用咗全透明嘅玻璃設計, 所以大家可以沿途欣賞九州嘅美景。

溫馨提示:  如果大家去嘅時間係春天, 大家可以喺纜車途中睇埋美麗嘅山櫻添~

上到去之後, 大家可以欣賞到成個九州嘅城市脈搏, 五光十色嘅燈火下,突顯北九州繁榮嘅一面。

無論係接近入夜 掟係已經入夜, 360度咁飽覽全個九州市, 令人不禁驚嘆呢個城市嘅活力無窮!

第四位:  函館山

函館其實係全個北海道最大嘅地方, 而函館山更獲選為米芝蓮世界3大夜景之一, 皆因佢喺城市急速發展同時, 仍然能夠保留長長嘅天然海峽, 優美環境之餘, 仲突顯出北海道嘅樸實民風。

去到觀景區, 愛好拍攝者會即刻出動佢地嘅腳架丶長鏡頭.......圓形而寬闊嘅平台, 方便你影低函館最美嘅一頁~

接近日落黃昏時分,  太陽好似依依不捨離開呢個咁美麗嘅地方, 為即將入夜嘅函館注入一線曙光~

即使到咗晚上嘅函館, 唔單止唔會變暗之餘, 反變成另一個浪漫嘅聖地, 愛侶們快D過嚟一齊欣賞呢個發光嘅黃金城市, 函館。

第三位:  神戶嘅摩耶山

同樣以百萬夜景聞名海外嘅摩耶山, 高至600尺, 所以大家上去嗰陣記得要著多件衫, 因為氣溫有D低。而上到去之後, 摩耶山嘅著名觀景區-掬星台, 到咗晚上, 會變成星光閃閃, 好似可以徒手摘星星咁。

雖然仲未入夜, 但係神戶港灣相比起函館嘅, 係另一番人口暢旺嘅都市魅力, 而高樓同基建亦都相對比較多同頻密。

漸漸暗起來嘅神戶被點點燈火照亮起嚟, 而到了晚上, 神戶已經蛻變成一條火洪洪嘅金龍, 好有活力呀!

神戶嘅摩耶山除咗夜景迷人之外, 佢亦都係約會聖地。大家睇唔睇到呢條星光小徑?其實係一D螢光石推砌而成, 愛侶們不妨嚟呢度浪漫一吓呢~

溫馨提示:  大家如果係秋天上山, 大家可以戀戀色彩繽紛嘅楓葉, 真係好美嫁!

第二位:  札幌嘅藻岩山

北海道除咗函館山之外, 位於札幌嘅藻岩山亦都係另一大睇夜景嘅地方。藻岩山點解排上第二位呢?全因為佢有保肓嘅意識, 大家仍然可以清楚發現札幌嘅運河丶森林......等等嘅大自然景觀。而且, 因為位於500米無阻擋嘅高空臨下, 大家可以360度全景觀欣賞札幌嘅美麗, 大家不妨隨時嚟呢度打卡嫁。

札幌有好多浪漫嘅地方, 但又點少得呢度嘅"幸福鐘", 只要同另一半嚟到呢度, 輕輕一敲, 會唔會為你打開幸福之門呢?

"幸福鐘"旁仲有好多"情人鎖", 不妨同另一半嚟到呢個"愛嘅角落"~

藻岩山嘅Star Hall 仲設有由3D製作而成嘅星河短片介紹, 愛觀星嘅一族一定要嚟呢度朝吓聖~

第一位:  長崎嘅稻佐山

終於嚟到冠軍之位, 就係非長崎嘅稻佐山莫屬。要上稻佐山, 一定由淵神社上面嘅纜車至可以到達。

當纜車一直往山上爬, 你會發現自己置身喺群山之中, 真係好壯觀同振撼嘅情景呀。

不消6分鐘, 就可以直接抵達山頂, 遠眺望落嚟, 美麗迷人嘅海港映入眼內, 而群山四起嘅自然景觀, 成為咗長崎獨有嘅迷人魅力。

嘩!連山頭都被都市嘅燈火照耀得更生動同埋璀璨可愛。

所以, 大家都成群結隊, 一齊飽覽群峰下嘅美麗長崎市夜景啦~

想一邊欣賞夜景, 一邊食晚飯嘅朋友, 可以去吓觀景餐廳度試試當地嘅美食 , 連明星都去光顧, 味道幾好食嫁, 大家可以一試!