雖然宜家正過緊令人透不過氣嘅炎夏, 但係想同另一半一齊去難忘嘅旅行? 宜家plan掟差唔多啦, 過多幾個月後, 又到楓葉季, 日本邊度睇好呀?

香川縣

“香川”大家可能未聽過, 但如果叫 “讚岐”呢? “讚岐”其實係佢嘅舊名, 大家一定會唸起好好食嘅烏冬, 其實佢又點止烏冬吸引, 仲有靚景嫁~講緊嘅就係楓葉啦, 想和另一半愛在深秋, 一定要嚟到栗林公園同寒霞溪。

栗林公園

未去過栗林公園等於無去過香川, 皆因佢係全個日本最大嘅西洋庭園公園。除咗面積大之外, 佢嘅靚景仲得到米芝蓮嘅讚賞。

大家可以見到橘紅色嘅楓葉垂生喺湖嘅旁邊, 而湖面平如鏡面, 有時連鴨子都會游嚟湊湊熱鬧, 如此仙境國度嘅美景, 令人目不暇給~

晚上嘅公園點起咗唔同顏色嘅燈光, 為戀人製造咗另一個浪漫嘅場地。

除咗可以沿住公園嘅小徑散步之外, 大家仲可以泛小舟, 旁邊嘅楓葉好似夾道歡迎大家咁, 而金黃綠色嘅楓葉又有另一番嘅淒美感~

全個公園不得不提就係西洋嘅庭園設計, 背景就係唔同顏色嘅楓葉群漫山遍佈,  呢種咁不一樣嘅美畫, 只有喺栗林公園至會可體驗到。

寒霞溪

想睇野生高地嘅楓葉? 可以去寒霞溪遊覽吓。嗰度啲溪流其實係因為火山活動同風化作用而形成, 所以喺嗰度可以欣賞到好美嘅楓葉之外, 仲可以趁機睇埋奇特嘅岩石丶溪流等等……

由於喺高山上, 所以要由纜車至可到達, 沿途經過色彩斑斕嘅楓葉圍繞住一座座嚴峻嘅山脈,令人美不勝收~

上到去之後,野生嘅葉子由橘紅色漸變成金黃色, 大家可以一邊慢步, 享受住詩情畫意。

色彩繽紛嘅野生楓葉沿住一個個奇珍嘅岩石生長, 對出仲可以睇到群群嘅小島, 呢個就係大自然嘅奧妙啦!

愛媛縣

大家可以唔太熟悉愛媛縣,儘管離瀨戶內海好近, 但係全年嘅雨量唔多, 但係都無影響到佢嘅收成, 皆因佢嘅特產就係香甜嘅蜜桔啦。 除此之外, 佢都有璀璨迷人嘅楓葉睇嫁~

石鎚山

想唔想同另一半一齊冒險下, 但又想睇吓靚景, 大家可以行吓石鎚山。雖然佢係日本西邊最高嘅山脈, 但每年秋天都吸引咗好多旅客嚟到欣賞嫁~

儘管要征服呢個山峰, 需要嘅體力勞動亦不少, 但係當見到咁險要嘅高峰竟然可以造就出咁色彩迷人嘅楓葉, 真係不禁令人佩服!

夕陽斜下種滿咗澄黃楓葉嘅山頭, 絢麗奪目嘅美景好像為戀人們增加幾分浪漫又淒美嘅情懷~

茨城縣

大家都可能對茨城縣嘅櫻花同瀑布略有所聞, 但係楓葉呢?原來佢嘅楓葉都好出名嫁, 宜家就介紹一個連本地人都會去賞楓嘅好地方。

花貫溪谷

呢度就係花貫溪谷啦, 又名為 “花園溪谷”, 皆因佢生長咗色彩艷麗嘅楓葉同埋唔同種類嘅植物,好似一個花園咁。戀人們行過呢條汐見滝吊橋, 沿路欣賞住唔同嘅楓葉, 真係另有一番日本“楓”情嘅味道~

楓葉隨住緩緩嘅溪水流走, 令煩惱都能拋諸腦後~